Mat 25 | BEF | STEP | Yesu kaga luloto bame ka mone lu epi'ehina: Ya'mana yupahi kokulumamofihi kapo nayahi luga luga su hago nehana yafana'magihi suhi hilina'mu yabe. Bo mone liha'a hiti etayanugu lilu'ibe'mu hilina bo alube'mu hilibe. Ya nohinogo enali ya'mana yafana'magi lamu libi'ani li gilete kapoga bite sa sa hite le'moto alune lite yabe.

Matthew 25

Teni yafana'magihi bame ka

1 Yesu kaga luloto bame ka mone lu epi'ehina: Ya'mana yupahi kokulumamofihi kapo nayahi luga luga su hago nehana yafana'magihi suhi hilina'mu yabe. Bo mone liha'a hiti etayanugu lilu'ibe'mu hilina bo alube'mu hilibe. Ya nohinogo enali ya'mana yafana'magi lamu libi'ani li gilete kapoga bite sa sa hite le'moto alune lite yabe. 2 To nayahi mone kegi'a su hana yafana'i enali enekesagu fe melina yafana'i yabe. To nayahi luga kegi'a su hana yafana'i enali enekesagu fe lu'ehina yafana'i yabe. 3 Enekesagu fe melina yafana'magi lamu libi'ani lite banaya to kalasini su nohenogo heki bilana kaba'a melise bi'ahana yabe. 4 To enali enekesa hiti yafana'i enali lamu libi'ani nelite to kilulu koha'anigu kalasini heki bai tete su nohenogo heki bilana kaba'a lite bi'ahana. 5 Liha'a hiti etayanugu lilu'ibe'mu ha'ina bo ai mele'isi meago asaga yafana'i geba hite minapa minapa higo enubu loko toko higo enubu'i ke'ahana.

6 To folugu'i sipi kehe mone ilete ma lite li'ahana: Liha'a hite etayanugu lilube'mu nohina bomo ma noabe. Lenali kapoga bite be gete be tigite le'mete alo lite kehe i'ahana. 7 Ya lago enali ya'mana yafana'i ho tilete lamu libi'ani li kulu tite li loloba hi'ahana. 8 To enali enekesa fe melina yafana'magi enekesa ni'igo enekesagati kalasini kaba'a hiti lite e'ahana yafana'magihi ma lite enoloka he'ahana: Lenali kalasini luga'a limilo. Lali libiti asabalube'mu nohibe li'ahana. 9 Ya lago enali enekesagati kalasini'ani hiti lite ana yafana'magi li'ahana: O'e, ma li'ohuta kalasiniuba lali hiti lenali hiti bati mehilina'mu yabe. Lenali situaluguti bite fato'i mina filo. 10 Enali enekesa fe melina yafana'magi kalasini mina filune'mu a'nebago ya'mana bo liha'a yanugu lilube'mu hina bo neheti'ehina. Ya higo enali lele hite minana yafana'i ana bo hiti nonuga tilete ana bouba liha'a hiti etayanugu li'igo ana gukete nose'na babu lite nete mine'ahana. Ya nehago ana noto kasihi hekini lo'ehina yabe.

11 To alihi enekesagu fe melina yafana'i ete kasitoti ma lite kehe i'ahana: Sipi boti yale. Sipi boti yale. Kai kafe sigi letobo. 12 Ya lago ai sipi bouba ma luto lu epi'ehina: Nani lenali'i mekeheli'ohube lu'ehina yabe. Yesu ana bame ka mone'a hiti molo emiloto ma luto lu epi'ehina: 13 Ya hu'ehinagi lenali kaba hu bati hilo. Kokulumaguti limi'ehina Bouba aku alina yupahi to kana'a hiti lenali mekeheli'ahabe.

Loegi monegi lili'nalo pana'magi bame ka

Lk 19:11-27

14 Bo moneuba hepa'a he'miloto foto hepatoga bonohi bilube'mu hilina suhi huto kokulumamofihi kapo'a minalina'mu yabe. Ai lili'na pana'a kehe i nupa huloto ai enali enayanugu fe'noha'a molo'ehina. 15 Ai lili'nalo pana'amagihi hapa'anilo hiti to enali lili'na lilata nehana hapa'ani keheli fe luloto moni efahi guna ito epi'ehina. Mone'amofihi 5,000 kina emi'ehina, to mone'amofihi 2,000 kina emi'ehina, to mone'amofihi 1,000 kina emi'ehina. Ya huto guna ito epiloto abufa hu'ehina. 16 Ai ana kaba bo'ani abufa hulago 5,000 kina lina bouba hololu luto ana efatoti bisinisi mololoto 5,000 kina aku'i molo emito mone'a hiti efahi huto li'ehina yabe. 17 To kaba bo'auba 2,000 kina emi'ehina bouba ana huto bisinisi mololoto aku'i 2,000 kina molo emito mone'a hiti efahi huto li'ehina. 18 Ya ha'ina ai 1,000 kina kaba bo'auba emina bouba ai lito buto melugu keli kifiloto anagu keli ho'ehina yabe.

19 Yatama kana'a a'mino yatama huloto sipi bo ai aku'i hepa'aga o'ehina. Ya huloto lili'nalo pana'amagihi efaha'a epi'ehina li nupa huto li eto hilube'mu hu'ehina. 20 To 5,000 kina emi'ehina bo ai o'ehina, ai 5,000 kina mone hiti molo emito liloto oto ma luto lu'ehina: Sipi bo, kai 5,000 kina nimi'ahane. Bu gobo, nani bisinisi moloto'ni 5,000 kina mone'a aku'i okalago li'ohube. 21 Sipi bouba ma luto lu emi'ehina: Kai hetofa lili'nalo bo amuya bo nohane. Kai hetofa suhi li huto hu'ahane. Kai lili'nalo kaba hu bati hulata nohane. Kai lagaso'nasimofihi kumunalo hetofana huto kaba hu bati hu'ahatalo yatai nani babu fe'noto kaba kimi gi ketalube. Kai sipi boka hiti kegelonaguti ete minaliyo. 22 To 2,000 kina sipi bo'auba emi'ehina bo ana huto o'ehina. Ai ma luto lu'ehina: Sipi bo, kai 2,000 kina nimi'ahane. Bu gobo, nani bisinisi moloto'ni 2,000 kina mone'a hiti molo emito li'ohube. 23 Ya ligo sipi bo'auba ma luto lu emi'ehina: Kai hetofana huto amuya lili'nalo bo yabe. Kai lili'nalo bati huto kaba hulata nohane. Kai lagaso'nasimofihi le'mo bati huto kaba kimi gitamofihi okane'a yatai babu fe'noto kimi gi ketalube. Sipi boka hiti kai kegelonaguti ete minaliyo. 24 To 1,000 kina sipi bo'auba emi'ehina bo ana huto oloto ma luto sipi bo'a lu emi'ehina: Sipi bo, nani akeheli keto'ohube, kai hakale kaga lulata nohata bo nohane. Mone bouba foya hekolo'ehinaguti kai nose'na kifilata nohane. To mone meto bo moneuba nose'na legeya'a tili hu'ehinaloti kai nose'na'a lilata nohane. 25 Ya'mu luto nani kai kumu nelesa'ni ligo 1,000 kina nimitamo lito buto melugu keli hoto fala ki keto'ohuna yabe. Ya hu'ohuna efahaka nimi'ahata eto huto ma li keto'ohunagi libo. 26 Ya ligo sipi bo'auba ka'alo ma luto lu emi'ehina: Kai bati mehina lili'nalo bo fuligo koloto nominata bo yabe. Bo mone'mofihi foyaguti nose'na nokifito to mone melugu bo moneuba nose'na legeya'a tili hu'ehinaloti nose'na'a nani kumu noline luto noho fisa nokitaba kai keheli bati hu'ohuto nolapihe? 27 Ya latagi, kai hena hibe luto efaha'ni efaha nonugu memalane? Ya hatita nani oto ana efaha'nilo molo emi'ahago to mone hiti lutita'mu yabe. 28 Ya hinagi kai 1,000 kina li'ehina be silito 10,000 kina li'ehina bomofihi li emibo. 29 Hena'mube? Asaga bona'i ana'ina'ani ninalo nani mone'a hiti epilune'mu yabe. To mone bouba ana'ina'a meni'inogo nesi'nasi yanuga li'ehinana nani be sili he'miluna'mu yabe. 30 Ya huto ni'inagi ma bo lili'na melise fulilo bo fegutoga metepu inagu nu kite le'mo he'milo, ya hinogo enali anaga metepugu usegi asegi ite enagabu kumu yolege balege ite gelehe gelehe hite enabagalo heni kofi'ehite yibi hite metepugu minalabe luto Yesu bame ka lu epi'ehina yabe.

Yesu asaga boana'i guna ito enele'mo eto eto hilina

31 Nani Kokulumaguti limi'ohuna Bo nohuto gihiti bo suhi huto oto agelomagi hiti aku aluta yupahi sipi kefa hisalo nani minaluna'mu yabe. 32 Ya hu'ehinogo'ni asaga melugu boana'i nani nubulo li gehesa hilana'mu yabe. Ya hinogo yaga kaba bouba sipisipi yaga hiti meme yaga hiti enele'mo guna iloto loegu enele'mo luga luga ilata nohina suhi huto nani ana huto ilube. 33 Nani sipisipi yagamagi nayahi lamaga'aga enele'mo nomoloto to meme yaga nayahi soga'aga enele'mo malaluna'mu yabe. 34 Ya hinogo'ni kibina bouba ai oloto nayahi lamaga'niga nehana bona'i ma luto lu epilina'mu yabe: Lenali alo. Afo'nifu lenele'mo bati hilibe. Koyapa'i ai kokuluma hiti me'i hiti lolo hu'ehina kana'alo Afo'nifu kapo'a li hokolo hu lepolo'ehina kapo lenali ete tilo. 35 Hena'mugope? Koyapa'i nani kau'na nonalago lenali nose'na nimi'ahana yabe. To nagami kumu lubaha'ni hosopa noigo lenali nagami'i nimigo no'ohuna yabe. To nani hepa'ni he'miloto ka bo oto nohugo lenali nohatinigu nele'mo mele'ahana yabe. 36 To nani nugufa yapako nohugo lenali nugufalo gukete li hekele nete'ahana yabe. Nani nebesigo koloto nohugo lenali fulu fulunatu ite ete soso hi nete'ahana yabe. Nani naga nonugu nohugo lenali ete bu negete nebe tigi'ahana yabe. 37 Ya linogo enali bati bona'i sipi bomofihi yahi lamaga'aga minanamagi ma lite sipi bomofihi loka halabe: Sipi boti. Hiya yupahi kau'na nokalago bu kogoto nose'na kimi'ohutabe? To hiya yupahi nagami kumu lubahaka hosopa noigo nagami'i kimi'ohutabe? 38 Hiya yupahi ka bo lolo huto nohanogo lali nohatigu kele'mo molo'ohutabe? To hiya yupahi kai kugufa yapako nohanogo lali gukete li hekolo keto'ohutabe? 39 Kai hiya yupahi kebesi'ehigo lali buto soso hu ketola, to naga nonugu nohanogo lali buto kebe tigila hu'ohutabe? 40 Ya lite noloka henogo nani sipi gihiti bomofita ma luto lu epilube: Nani ma'naka luto lu nolepube. Musufalo bo mone nalalu'nifihi ma melugu ya'mana suhi hi ete'ehilana ya'ma nani'i nele'mo bati hi'ahabe.

41 To nani nayahi soga'niga nehana bonatoga i behe huloto ma luto lu epilube: Lenali foipa bona'i. Lenali logo mesobose logo loba loba huto nina hepatoga bilo. Ya'mana logo Afo'nifu Sata hiti foipa fele'a hiti mesobose loba loba logo go epolo'ehinalo yabe. Lenali analo bilo. 42 Hena'mugope? Nani kau'na nahago nohugo lenali nose'na menimi'ahanabe, nagami kumu lubaha'ni hosopa noigo lenali nagami'i menimi'ahanabe. 43 Nani ka bo oto hepatinigu nehetuna nohatiniluga nele'mete meti'ahabe. Nani nugufa yapako nohugo lenali gukete nugufalo li mehekele nete'ahana yabe. Nani nebesigo koloto nohugo lenali ete soso mehi nete'ahabe. To nani naga nonugu nohugo lenali ete bu negete nebe metigi'ahana yabe luto gihiti bo lu epi'ehina. 44 Ya luto lu epinogo enali ka'alo nona'a ma lite lu emilabe: Sipi Botimaka. Hiya yupahi kau'na kohola, lubahaka hosopa ila, ka bo minola, kugufa yapako minola, kebesila, naga nonugu minola hu'ahanogo lali kele'mo bati mehu'ohune? 45 Ya lite loka henogo gihiti bouba ma luto lu epilube: Nani ma'naka luto lu nolepube. Musufalo bo nalalu'nigihi ma melugu enele'mo bati mehi'ahanaya nani'i nele'mo bati hite menehe'me'ahabe. 46 Ya linogo ya'mana bona'i enali enagabu ginogo minoba minoba hepalugu bite minalabe. To bati bona'a enali hetofa hepa'i minoba minoba hilana hepato bilana'mu yabe, luto Yesu lu epi'ehina yabe.